10+ MOTIBU DI KON MATRIMONIO GAY TA 'ROBES'
Un tradukshon i adaptashon na Papiamentu i e situashon na Korsou di un 'Post' anterior riba FaceBook di Cole Emarine...

1. Ser gay no ta natural. Yu’i Kòrsou di bèrdè semper a rechasá kosnan ku no ta natural, manera brel, polyester i èrko.

2. Matrimonio gay lo enkurashá hende pa ta gay, meskos ku sali ku hende largu ta hasibu largu...

3. Legalisashon di matrimonio gay lo habri porta pa yen komportashon straño. Hende por disidi pa bai kasa ku bestia, pasobra un kacho tambe por inskribí na kranshi i firma un kontrat di matrimonio...

4. Matrimonio heteroseksual tabat’ei semper i nunka e n’ kambia: hende muhé ainda ta propiedat di hende hòmber, hende di koló ainda no por kasa ku hende blanku, i divorsio ainda ta ilegal

5. Matrimonio heteroseksual lo pèrdè su balor ora bo pèrmití matrimonio Gay. Lo bo destruí e santidat di Britney Spears su matrimonio djis pa prèt, ku a dura ni 55 ora.

6. Matrimonionan heteroseksual ta balido pasobra nan ta produsí yu. Parehanan gay, parehanan infèrtil, i hende grandi lo no tin mag di kasa, pasobra ainda nos ke pone mas yu djafó riba mundu, i mundu no ta sufisiente yen ainda

7. Ta opvio ku mayornan gay lo kria yunan gay, ya ku mayornan heteroseksual ta kria yunan heteroseksual so...

8. Varios Religion ta rechasá matrimonio gay. Den un Demokrasia manera esun di nos, nos mester impone e balornan dje religionnan aki riba hinter pais. Ta p’esei hende ku no tin religion o otro religion no ta ser konsiderá hende na Kòrsou.

9. Mucha nunka por ta eksitoso den bida sin un modelo di un tata i mama na kas. Ta pesei komo pais nos ta prohibi mama i tata soltero di kria yu.

10. Matrimonio gay lo kambia e fundeshi di nos sosiedat. Hamas i nunka nos lo no por adapta na normanan sosial diferente, manera nos a adapta na outo, televishon i internet

Un èkstra di un lesadó:

11. Matrimonio gay ta un mal ehèmpel pa nos muchanan. Pasobra nan lo lanta mirando hende gay biba huntu, di moda ku nan lo krese bira adultonan tolerante, fleksibel i sin prehuisio. Nos no ke esei...

(Tradusí i adaptá pa Mario Kleinmoedig)